Blog

Uncategorized

ଗର୍ଭସ୍ରାବ? ଏହା ପରେ କ’ଣ?

ଗର୍ଭସ୍ରାବ? ଏହା ପରେ କ’ଣ?

ଏକ ଅଜାତ ଶିଶୁକୁ ଆଲିଙ୍ଗନ କରିବାର ସ୍ୱପ୍ନକୁ ଲିଭାଇବା ସହଜ ନୁହେଁ,
ଏବଂ ଆପଣ କିଣିଥିବା ରଙ୍ଗୀନ ଫ୍ରକ୍, ସୁନ୍ଦର ସାର୍ଟ, କିମ୍ବା ଗ୍ଲୋବ୍ସକୁ ଭୁଲିବା ସହଜ ନୁହେଁ ।
ଯଦିଓ ଏହା ସବୁ ବାସ୍ତବ ଥିଲା, କିନ୍ତୁ ଏବେ ଏହା ଏକ ସ୍ୱପ୍ନରେ ପରିଣତ ହୋଇଛି!

20 ସପ୍ତାହ ପୂର୍ବରୁ ହରାଇଥିବା ଗର୍ଭଧାରଣକୁ ଗର୍ଭସ୍ରାବ ବୋଲି କୁହାଯାଏ । ଆଶାୟୀ ପିତାମାତାଙ୍କ ପାଇଁ ଗର୍ଭସ୍ରାବ ଏକ ଯନ୍ତ୍ରଣାଦାୟକ ଅନୁଭୂତି ହୋଇଥାଏ । ସନ୍ତାନ ପ୍ରାପ୍ତ କରିବାର ସ୍ୱପ୍ନ ଭାଙ୍ଗି ଚୁରମାର ହୋଇଯାଏ । ଉଭୟ ଶାରୀରିକ ଏବଂ ମାନସିକ ଭାବରେ ସୁସ୍ଥ ହେବା ପାଇଁ ଅନେକ ସମୟ ଲାଗେ, କାରଣ ଆଶାୟୀ ପିତାମାତା ସେମାନଙ୍କର ଭବିଷ୍ୟତର ଶିଶୁ ବିଷୟରେ ଅନେକ ଯୋଜନା କଳ୍ପନା କରିଥାଆନ୍ତି । ସେହି ଦୁଃଖ ଏବଂ ଯନ୍ତ୍ରଣା ସାନ୍ତ୍ୱନା ପାଇବା ଠାରୁ ବହୁତ ବାହାରେ । କିନ୍ତୁ ମନେରଖନ୍ତୁ, ଗର୍ଭସ୍ରାବ ଜୀବନର ଶେଷ ନୁହେଁ! ସବୁବେଳେ ଭରସା ରଖନ୍ତୁ । ଅନେକ ଦମ୍ପତି ଅଛନ୍ତି, ଯେଉଁମାନଙ୍କର ବାରମ୍ବାର ଗର୍ଭସ୍ରାବ ପରେ ମଧ୍ୟ ଚମତ୍କାର ପରିବାର ରହିଛି ।

ଗର୍ଭସ୍ରାବର ମୁକାବିଲା କରିବା:

ଦୁଃଖ ପ୍ରକାଶ କରିବା ସଂପୂର୍ଣ୍ଣ ସ୍ୱାଭାବିକ ଅଟେ:

ଗର୍ଭସ୍ରାବକୁ ଗ୍ରହଣ କରିବା ଏବଂ ଏକ ଅଜାତ ଶିଶୁକୁ ହରାଇବାର ଏହି ଯନ୍ତ୍ରଣାଦାୟକ ଯାତ୍ରାରେ ଆପଣ ଏକା ନୁହଁନ୍ତି ବୋଲି ହୃଦୟଙ୍ଗମ କରିବା ଗୁରୁତ୍ୱପୂର୍ଣ୍ଣ ଅଟେ । କାନ୍ଦିବା, ନିରାଶ ଅନୁଭବ କରିବା ଏବଂ ଉତ୍ତେଜିତ ହେବା ସମ୍ପୂର୍ଣ୍ଣ ସ୍ୱାଭାବିକ ଅଟେ । ନିଜର ଦୁଃଖ, ଯନ୍ତ୍ରଣା, କଷ୍ଟ ଇତ୍ୟାଦିକୁ ମୁକ୍ତ କରିବା ପାଇଁ ନିଜେ ନିଜର ଉପାୟ ଖୋଜନ୍ତୁ ।

ନିଜ ଜୀବନସାଥୀଙ୍କ ସହିତ କଥା ହୁଅନ୍ତୁ:

ଗର୍ଭସ୍ରାବ ପରେ ଦୋଷୀ ଅନୁଭବ କରିବା ଅତି ସାଧାରଣ ଅଟେ । ଜଣଙ୍କର ଅସାବଧାନତା କିମ୍ବା ଭାଗ୍ୟକୁ ଦାୟୀ କରିବା ଅନାବଶ୍ୟକ ଅଟେ । ନିଜ ସାଥୀଙ୍କ ସହିତ ଯନ୍ତ୍ରଣା ଏବଂ କ୍ଷତିର ଭାବନାକୁ ବାଣ୍ଟନ୍ତୁ । ଦୟାଭାବ ଏବଂ ଧୈର୍ଯ୍ୟର ସହିତ ଶୁଣିବା ହିଁ ସ୍ୱାମୀଙ୍କଠାରୁ ଆବଶ୍ୟକ ହୋଇଥାଏ । ଗର୍ଭସ୍ରାବର ଅନେକ କାରଣ ଥାଇପାରେ । ତେଣୁ, ନିଜକୁ ଦୋଷ ଦେବା ବନ୍ଦ କରନ୍ତୁ!

ଏକ ସହାୟକ ଗୋଷ୍ଠୀରେ ଯୋଗ ଦିଅନ୍ତୁ:

ଗର୍ଭସ୍ରାବର ସାମ୍ନା କରୁଥିବା ଦମ୍ପତିମାନଙ୍କ ପାଇଁ ଅନେକ ଅନଲାଇନ୍ ଫୋରମ୍ ଏବଂ କମ୍ୟୁନିଟି ସହାୟତା ପ୍ରଦାନ କରନ୍ତି । ଏହି ଗୋଷ୍ଠୀ ଆପଣଙ୍କ ଯନ୍ତ୍ରଣା ଏବଂ ନିରାଶାର ଭାବନାକୁ ବାହାର କରିବା ପାଇଁ ସର୍ବୋତ୍ତମ ସ୍ଥାନ ହୋଇପାରେ ଏବଂ ଗର୍ଭସ୍ରାବ ତଥା ସଫଳ ଗର୍ଭଧାରଣ ବିଷୟରେ ଅନ୍ୟ ଲୋକଙ୍କ ଅନୁଭୂତି ମଧ୍ୟ ଜଣାଇଥାଏ, ଯାହା ଆପଣଙ୍କୁ ଉତ୍ସାହିତ କରାଇପାରେ ଏବଂ ଆତ୍ମବିଶ୍ୱାସକୁ ବଢ଼ାଇପାରେ ।

ପରାମର୍ଶ ନିଅନ୍ତୁ:

ଯଦି ଆପଣ ନିରାଶାର ଭାବନାରୁ ବାହାରକୁ ଆସିବାକୁ ଅସମର୍ଥ ଏବଂ ଯଦି ଏହା ଆପଣଙ୍କର ଦୈନନ୍ଦିନ ଜୀବନକୁ ପ୍ରଭାବିତ କରୁଛି, ତେବେ ମନୋବିଜ୍ଞାନୀ/ଥେରାପିଷ୍ଟଙ୍କ ସହ କଥା ହେବା ହିଁ ଭଲ, ଯିଏ କି ଧ୍ୟାନ କିମ୍ବା ଅନ୍ୟାନ୍ୟ କୌଶଳ ମାଧ୍ୟମରେ ଦୁଃଖ ଦୂର କରିବାରେ ସାହାଯ୍ୟ କରିପାରିବେ ।

ପ୍ରଜନନ ଶକ୍ତି ପାଇଁ ସହାୟତା ନିଅନ୍ତୁ:

ସାଧାରଣତଃ ଗୁଣସୂତ୍ର ଅସ୍ୱାଭାବିକତା ହେତୁ ଗର୍ଭସ୍ରାବ ହୋଇଥାଏ । ପ୍ରଜନନ ଶକ୍ତି ଯାଞ୍ଚ କରିବା ଭଲ ଅଟେ, ଯାହା କି ଗର୍ଭସ୍ରାବର ସମ୍ଭାବ୍ୟ କାରଣ ନିର୍ଣ୍ଣୟ କରିବାରେ ସାହାଯ୍ୟ କରିଥାଏ । ପୁନର୍ବାର କେବେ ଗର୍ଭଧାରଣ ପାଇଁ ଚେଷ୍ଟା କରିବେ ସେଥିପାଇଁ ମଧ୍ୟ ଆପଣ ପରାମର୍ଶ ପାଇପାରିବେ ।

ଏହା ପରେ କ’ଣ?

ଗର୍ଭସ୍ରାବ ହେଉଛି ସବୁଠାରୁ ଖରାପ ଜିନିଷ ଯାହା ଆପଣଙ୍କୁ ଶାରୀରିକ ଏବଂ ମାନସିକ ସ୍ତରରେ ପ୍ରଭାବିତ କରିପାରେ । କିନ୍ତୁ ଅପେକ୍ଷା କରନ୍ତୁ । କିଛି ଭଲ ଜିନିଷ ଆସିବାକୁ ସମୟ ଲାଗିଥାଏ । ଆଶା ହରାଇବା ସମାଧାନ ନୁହେଁ, କିନ୍ତୁ ସଠିକ୍ ଦିଗରେ ସଠିକ୍ ପଦକ୍ଷେପ ନେବା ହିଁ ଆବଶ୍ୟକ ଅଟେ ।

ଗର୍ଭସ୍ରାବର କାରଣ

ଅଧିକ ବୟସରେ ମାଆ ହେବା, ଧୂମପାନ, ମେଦବହୁଳତା, ଅନିୟନ୍ତ୍ରିତ ମଧୁମେହ ଇତ୍ୟାଦି
ଗର୍ଭସ୍ରାବର କେତେକ ପ୍ରମୁଖ କାରଣ ଅଟେ । ଜଣେ ମହିଳାଙ୍କ ବୟସ ବଢ଼ିବା ସହିତ ଡିମ୍ବର ମାନ କମିଥାଏ । ଏହାସହିତ, ଯଦି ଆପଣ 35 ପରେ ଗର୍ଭଧାରଣ କରିବାକୁ ଚେଷ୍ଟା କରୁଛନ୍ତି ଏବଂ ଯଦି ଆପଣ IVF ଚିକିତ୍ସା କରୁଛନ୍ତି, ତେବେ PGT (ପ୍ରିପ୍ଲାଣ୍ଟେସନ୍ ଜେନେଟିକ୍ ଟେଷ୍ଟିଂ) ପରି ଏକ ଉନ୍ନତ ଜେନେଟିକ୍ ପରୀକ୍ଷା ସୁସ୍ଥ ଭ୍ରୁଣ ବାଛିବାରେ ସାହାଯ୍ୟ କରିଥାଏ, ଯାହାଦ୍ୱାରା ଗର୍ଭସ୍ରାବ ହେବାର ଆଶଙ୍କା କମିଯାଏ ।

ଗର୍ଭଧାରଣ ପୂର୍ବବର୍ତ୍ତୀ କାଉନସେଲିଂ/ପ୍ରଜନନ ଶକ୍ତିର ପରୀକ୍ଷା ଆପଣଙ୍କୁ ସମସ୍ୟା କେଉଁଠାରେ ଅଛି ଜାଣିବାରେ ସାହାଯ୍ୟ କରିପାରିବ ଏବଂ ପରବର୍ତ୍ତୀ ସମୟରେ ଏକ ସଫଳ ଗର୍ଭଧାରଣ କରିବାରେ ଚେଷ୍ଟା କରିବ ।

ବେଳେବେଳେ ପିତାମାତା ହେବାର ରାସ୍ତା କଠିନ ମନେହୁଏ, କିନ୍ତୁ ଏହାର ଅର୍ଥ ନୁହେଁ ଯେ ସବୁ ଆଶା ସମାପ୍ତ ହୋଇଯାଇଛି! ଆଶା ହରାନ୍ତୁ ନାହିଁ!

ପିତାମାତା ହେବାର ଶୁଭେଚ୍ଛା!

Write a Comment

/%E0%AC%97%E0%AC%B0%E0%AD%8D%E0%AC%AD%E0%AC%B8%E0%AD%8D%E0%AC%B0%E0%AC%BE%E0%AC%AC-%E0%AC%8F%E0%AC%B9%E0%AC%BE-%E0%AC%AA%E0%AC%B0%E0%AD%87-%E0%AC%95%E0%AC%A3/