அடினோமையோசிஸ் பற்றி நீங்கள் தெரிந்துகொள்ள வேண்டியவை

கருப்பை அடினோமையோசிஸ் என்பது வலி மிகுந்த மாதவிடாயை விட வேதனையானது. அடினோமையோசிசை பற்றி புரிந்து கொள்ள, கருப்பையின் உடற்கூறியலைப் பற்றி புரிந்து கொள்வது அவசியம்.

கருப்பை, கீழ்காணும் அடுக்குகளால் ஆனது.

மையோமெட்ரியம்:

வெளிப்புறத்தில் உள்ள மென்மையான தசை.

எண்டோமெட்ரியம்:

மாதவிடாய் சுழற்சியின் போது வளரும் உட்புற அடுக்கு. கருப்பை, கருவுற்ற கருமுட்டையை பெற இது உதவுகிறது.

“இணைப்பு மண்டலம்” அல்லது “உட்புற மையோமெட்ரியம்” என்பது இவ்விரண்டு அடுக்குகளுக்கும் இடையில் அமைந்திருக்கும் பகுதியாகும். இது எண்டோமெட்ரியத்தையும் தசை அடுக்கையும் பிரிக்கிறது. ஒரு ஆரோக்கியமான கருப்பையில் இந்தப் பகுதியின் கனம் 2-8 mm வரை இருக்கும்.

ஒரு பெண்ணுக்கு அடினோமையோசிஸ் இருந்தால், அவரது கருப்பை தசை சுவருக்குள் எண்டோமெட்ரியல் திசு வளர்ந்து, இணைப்பு மண்டலத்தை தடிமனாக்கும். அடினோமையோசிஸ் இருந்தால், இந்த இணைப்பு மண்டலத்தின் கனம் 12mm அல்லது அதற்கு மேல் இருக்கும். இதனால் கருப்பை பெரிதாகி அசௌகரியமான மற்றும் வலி மிகுந்த அறிகுறிகளை ஏற்படுத்தும். மையோமெட்ரியத்தில் காணப்படும் கட்டிகளும் அடினோமையோசிசை குறிக்கின்றன.

35 வயதுக்கு மேற்பட்ட நடுத்தர வயது பெண்களில் அல்லது எண்டோமெட்ரியோசிஸ் பாதித்த பெண்களில், அடினோமையோசிஸ் ஏற்படும் வாய்ப்புகள் அதிகம்.

இந்த அறிகுறிகளை கவனிக்கவும்:

• வலி மிகுந்த பிடிப்புகள் அல்லது இடுப்பு வலி
• நீண்ட நாட்களுக்கு நீடிக்கிற அல்லது அதிகமான மாதவிடாய் இரத்தப்போக்கு
• வலி மிகுந்த பாலியல் உறவு
• மலட்டு தன்மை

இந்த அறிகுறிகள் பிற அடிப்படை சிக்கல்களையும் குறிக்கலாம். இவை என்டோமெட்ரியோசிஸ் அறிகுறிகளுக்கு ஒத்திருக்கும்.

சிக்கல்கள்:

அடினோமையோசிஸ், பாதிக்கப்பட்ட பெண்களின் அன்றாட வாழ்வில் பாதகமான பாதிப்புகளை ஏற்படுத்தும்.

அடினோமையோசிஸ் பாதித்த பெண்களில், இரத்த சோகை, மலட்டுத்தன்மை, மற்றும் பிற கருப்பை பிரச்சனைகள் ஏற்படுவதற்கான ஆபத்துகள் அதிகம்.

அடினோமையோசிசும் கருவுறுதலும்:

அடினோமையோசிஸினால் கருப்பை வீங்கி பெரிதாகுவதால், பெண்களில் கருவுறுதலை பாதிக்கும் பல்வேறு சிக்கல்கள் ஏற்படும். இதன் விளைவாக, கரு பதித்தல் சிக்கல்கள் மற்றும் கருச்சிதைவு ஆபத்துகளை ஏற்படுத்தும் கருப்பை பிரச்சினைகள் ஏற்படும்.

ஆய்வுகளின் அடிப்படையில், கருவுறுதல் சிக்கல்களை ஏற்படுத்தும் என்டோமெட்ரியோசிஸ் மற்றும் பாலிப்கள் போன்ற மற்ற பிரச்சனைகளுடன் இணைந்து அடினோமையோசிஸ் ஏற்படும் என கண்டறியப்பட்டுள்ளது. பின்வரும் சில வழிகளில் அடினோமையோசிஸ் கருவறுதலை பாதிக்கலாம்.

1. கருத்தரிப்பதில் ஏற்படும் சிக்கல்கள்: இணைப்பு மண்டலத்தின் தடிப்பினால் ஏற்படும் கருப்பையின் சிதைவடைந்த அமைப்பு, விந்தணுக்கள் மற்றும் முதிர்ச்சி அடையா கருமுட்டைகளின் நகர்வை தடுத்து, கருத்தரிப்பையும் தடுக்கலாம்.
2. எண்டோமெட்ரியல் செயல்பாட்டில் ஏற்படும் சிக்கல்கள்: அலற்சி மற்றும் அதிகளவு ஈஸ்ட்ரஜன் ஹார்மோன் உற்பத்தியின் காரணமாக எண்டோமெட்ரியத்தின் செயல்பாடும் அதன் ஏற்புத்திறனும் பாதிக்கப்படும்.
3. கரு பதித்தல் குறைபாடு: மையோமெட்ரியத்துக்குள் படையெடுக்கும் எண்டோமெட்ரியல் திசு, தனக்குரிய செயலிலிருந்து மாறுவதன் காரணமாக, கரு பதித்தல் தோல்வியடையும் வாய்ப்புகள் அதிகமாகும்

அடினோமையோசிசும் கருத்தரிப்பும்:

அடினோமையோசிஸ் ஒரு பெண்ணின் கருத்தரிப்பு திறனை பாதிக்கிறது. ஒரு பெண் கருத்தரித்தாலும் கூட, கருச்சிதைவு, குறைவான பிறப்பு எடை, குறை பிரசவம், அம்னியாட்டிக் சவ்வுகளின் முன்கூட்டிய சிதைவு, கருப்பைத் தொற்றுகள் முதலியவை போன்ற தொடர்புடைய ஆபத்துகள் கருத்தரிப்பில் உண்டு.

மலட்டுத்தன்மையில் அடினோமையோசிஸ்கான சிகிச்சைகள்:

நீங்கள் பிற்காலத்தில் குழந்தை பெற்றுக் கொள்ள விரும்பினால், சரியான மற்றும் உங்களுக்கு ஏற்ற கருவுறுதல் சிகிச்சைகளை பெற்றுக்கொள்வது அவசியம்.

அடினோமையோசிஸிற்கு சிகிச்சை அளிக்கவும், நேர்மறையான கருத்தரிப்பு விளைவுகளை பெறவும், மருத்துவ முறைகள் அல்லது அறுவை சிகிச்சைகள் இருக்கின்றன.

கொனொடோடிராபின்-வெளியிடும் ஹார்மோன் அகோனிஸ்ட் (GnRH-a) போன்ற ஹார்மோன் சிகிச்சை, ஹார்மோன் தாக்கத்தையும் அழற்சியையும் கட்டுப்படுத்தவும் குறைக்கவும் பரிந்துரைக்கப்படுகின்றது. இதனால் இயற்கையாய் கருத்தரிக்கும் வாய்ப்புகள் அதிகமாகின்றன.

இவை அனைத்தின் முடிவாக:

40 வயதுக்கு மேற்பட்ட 10 இல் 6 பெண்கள் அடினோமையோசிசினால் பாதிக்கப்படுகின்றனர். கடுமையான மாதவிடாய் வலி மற்றும் இடுப்பு வலி போன்ற வலிகள் அடினோமையோசிசுடன் தொடர்புடையதாய் இருக்கலாம். இது கருவறுதலை மட்டும் பாதிக்காமல் ஒரு பெண்ணின் ஒட்டுமொத்த ஆரோக்கியத்தையும் பாதிக்கிறது.

கருத்தரிப்புக்கு முந்தைய நோய் கண்டறிதல், ஆலோசனை, மற்றும் விழிப்புணர்வு ஆகியவை, முன்கூட்டியே நோய் கண்டறிதல் மற்றும் சிகிச்சைக்கு தேவையாய் இருக்கிறது

உங்கள் இனப்பெருக்க ஆரோக்கியத்தை கட்டுப்பாட்டில் வைத்திருக்க, தொடர்ச்சியான மகளிர் மருத்துவ பரிசோதனைகளைப் பெறவும்